BREAKING : पुण्यात ‘Made in Pakistan’ लेबलवरून खळबळ
मंदिर परिसरातील जत्रेत विकत घेतलेल्या चादरीवर ‘Made in Pakistan’ लेबल; धुतल्यानंतर उघडकीस आला प्रकार
पुणे : पुण्यातील एका महिलेने मंदिर परिसरात भरलेल्या जत्रेतून खरेदी केलेल्या चादरीवर ‘Made in Pakistan’ असे लेबल आढळल्याचा दावा केला आहे. विशेष म्हणजे, चादर खरेदी करताना हे लेबल दिसले नव्हते. चादर धुतल्यानंतरच त्यावरील लेबल स्पष्टपणे दिसून आल्याचे महिलेने सांगितले. या घटनेचा व्हिडिओ सोशल मीडियावर व्हायरल झाल्यानंतर प्रशासन आणि पोलिस यंत्रणा सतर्क झाली आहे.
महिलेच्या म्हणण्यानुसार, मंदिर परिसरात आयोजित करण्यात आलेल्या मेळ्यातून ही चादर खरेदी करण्यात आली होती. काही दिवस वापरल्यानंतर चादर धुतली असता तिच्यावर ‘Made in Pakistan’ असे लिहिलेले लेबल दिसून आले. यानंतर संबंधित महिलेने हा प्रकार सोशल मीडियावर मांडला, ज्यामुळे या प्रकरणाची मोठी चर्चा सुरू झाली.
घटनेची माहिती समोर आल्यानंतर पोलिसांनी प्राथमिक चौकशी सुरू केली असून, संबंधित वस्तू बाजारात कशा पोहोचल्या याचा तपास केला जात आहे. तसेच या उत्पादनांचा पुरवठा करणारे व्यापारी, वितरक आणि विक्री साखळीची माहितीही गोळा करण्यात येत आहे.
दरम्यान, काही दिवसांपूर्वी महाराष्ट्रात ‘Made in Pakistan’ लेबल असलेली सौंदर्यप्रसाधने विक्री करत असल्याच्या आरोपावरून तीन जणांना अटक करण्यात आली होती. या पार्श्वभूमीवर आता चादरीवरील लेबल प्रकरणामुळे प्रशासनाची चिंता वाढली असून, आयात नियम आणि उत्पादनांच्या विक्रीबाबत अधिक तपास केला जात आहे.
या प्रकरणामुळे ग्राहकांनी वस्तू खरेदी करताना उत्पादनावरील माहिती, लेबल आणि उत्पादनाचा उगम याबाबत अधिक जागरूक राहण्याची गरज व्यक्त केली जात आहे.
मुख्य संपादक : वल्लुरी डेव्हिड राव